វគ្គសិក្សា

គោលបំណងនៃវគ្គបណ្តុះបណ្តាលសុជីវធម៌

សុជីវធម៌សម្រាប់ធុរកិច្ចដើរតួនាទីសំខាន់ក្នុងវិជ្ជាជីវៈ តាមការណែនាំ ការប្រព្រឹត្ត ទោះផ្លូវការ ឬក្រៅផ្លូវការ ដោយសង្កត់ធ្ងន់លើការពិចារណា និងការគោរពចំពោះអ្នកដទៃ។ ជួយបង្កើនកេរ្តិ៍ឈ្មោះ បង្កើតការជឿទុកចិត្ត និងបង្កើតអ្នកជំនាញប្រកបដោយការគោរពពីអ្នកជុំវិញ។

សង្គមដែលប្រកាន់ខ្ជាប់នៅប្រពៃណីទំនៀមទំលាប់ តែងតែផ្សារភ្ជាប់ជាមួយនឹងសុជីវធម៌ដែលមិនអាចខ្វះបាន កត្តានេះហើយដែលធ្វើអោយយើងត្រូវយល់ដឹងពីសុជីវធម៌ ឥរិយាបទនិងអាកប្បកិរិយាសមរម្យ ទោះជានៅក្នុងការជួបគារវកិច្ច ឬសំដែងការគួរសម ក្នុងពិធីផ្លូវការនិងក្រៅផ្លូវការ និងនៅក្នុងកាលៈទេសៈណាក្តី បង្ហាញអោយបុគ្គលនោះឃើញពីភាពម្ចាស់ការ អាចបត់បែនបានគ្រប់ស្ថានការណ៍យ៉ាងស្ទាត់ជំនាញ។ ក្នុងកម្រិតមូលដ្ឋាន ការប្រើប្រាស់សុជីវធម៌បានត្រឹមត្រូវរមែងតែងទទួលបានការកោតសរសើរ។ ជាងនេះទៅទៀត ការបង្ហាញអាកប្បកិរិយាសមរម្យជួយដល់ការរីកចំរើនអាជីព និងឱកាសការងារ ក៏ដូចជាការពង្រឹងកេរ្តិ៍ឈ្មោះរបស់ស្ថាប័នឬរបស់អ្នកផ្ទាល់។

ក្រមសុជីវធម៌ក្នុងវិស័យធុរកិច្ចគឺមានសារៈសំខាន់មិនអាចកាត់ថ្លៃបានឡើយ។បុគ្គលដែលមានសុជីវធម៌ល្អ តែងតែមានភាពលេចធ្លោក្នុងចំណោមក្រុមមនុស្ស។ ពួកគេមានឯករាជ្យភាពនិងបង្កើនសេចក្តីទុកចិត្តពីមជ្ឈដ្ឋានជុំវិញខ្លួន ដើម្បីជាប្រយោជន៍ក្នុងការបំពេញការងារ ក្នុងនោះផងដែរពួកគេតែងតែបង្ហាញឥរិយាបទគួរសមពីខាងក្នុងខ្លួន បង្កើតទំនាក់ទំនងប្រកបដោយវិជ្ជាជីវៈ ចាប់ផ្តើមពីការ គោរពគ្នាទៅវិញទៅមក និងបង្កើតលក្ខខណ្ឌការងារច្បាស់លាស់ ទំនុកចិត្ត និងមានប្រសិទ្ធភាព។

 នៅពេលដែលអ្នកជំនាញ និងមិត្តរួមការងារត្រូវបានបង្ហាញការគោរពនិងយោគយល់គ្នា ពួកគេបំពេញការងាររបស់ពួកគេបានប្រសើរជាងមុន និងធ្វើឱ្យទំនាក់ទំនងជាមួយអតិថិជនក៏ប្រសើរឡើងយ៉ាងខ្លាំង ដែលចុងក្រោយជំរុញឱ្យមានបរិយាកាសការងារល្អ និងបង្កើនផលិតភាព។